കുറിപ്പുകള്‍ 10 നവവത്സരം

പഴയ കാലം പുതിയ കുപ്പിയില്‍.
ഒന്നും മാറുന്നില്ല
നീയും ഞാനും ഒന്നും.
മാറുന്നത് കലണ്ടര്‍ മാത്രം.
വിലാപങ്ങളുടെ,കലാപങ്ങളുടെ, കണ്ണുനീരിന്റെ
ചിതറിയ പുസ്തകത്താളുകള്‍.
ഒന്നും മാറുന്നില്ല.
കണ്ണാടികള്‍ അല്ലാതെ.
എന്നിട്ടും ചുണ്ടില്‍ തേച്ച ചായം മായാതെ
നീയും ഞാനും മന്ത്രിക്കുന്നു
നവവത്സരാശംസകള്‍.

കുറിപ്പുകള്‍ 9 .അച്ഛന്‍ മകനോട്.

മകന്‍റെ നിവര്‍ത്തിയ കുഞ്ഞിക്കൈകള്‍.
വിയര്‍പ്പിന്‍റെയും ചളിയുടെയും അക്ഷാംശങ്ങള്‍.
അതില്‍ അവന്‍റ അക്ഷരങ്ങളുണ്ട്.
ചിത്രപുസ്തകത്തിലെ നിറങ്ങളുണ്ട്.
കണ്ണീരിന്‍റെ ഉപ്പുണ്ട്.
തലമുറകളിലേക്ക് പകരേണ്ട ചോരയുണ്ട്.
എങ്കിലും മകനേ,
തെറ്റിപ്പോയ കണക്കിനെക്കുറിച്ചോര്‍ത്ത്
റ്റീച്ചറിനുമുമ്പില്‍ നീട്ടിപ്പിടിച്ച കൈകളുമായി
വേവലാതിയുമായി
വിറച്ചുനില്‍ക്കുന്ന നീ ഒരിക്കലും അധീരനാകരുത്.
അച്ഛനെ ചിതയിലേക്കെടുക്കുമ്പോഴും
കൈകള്‍ വിറക്കരുത്.
മിഴികള്‍ നിറയരുത്.
കാരണം ഈ ലോകം ,
അതിന്‍റെ നിയമങ്ങള്‍ ദുര്‍ബലര്‍ക്കുവേണ്ടിയുള്ളതല്ല.

Add more friends to your messenger and enjoy! Go to http://messenger.yahoo.com/invite/